15.4.08

XX Conciertu pola Oficialidá



La Xunta pola Defensa de la Llingua Asturiana presentó a los medios el mayor de los Conciertos pola Oficialidá entamaos hasta’l momentu. Catorce de los meyores grupos asturianos van actuar nesta vixésima edición durante dos díes de reivindicación llingüística, música y folixa.

El XX Conciertu pola Oficialidá va facese nel Pabellón de les Naciones de la Feria de Muestres d’Asturies en Xixón los díes vienres 25 y sábadu 26 d’abril. Les actuaciones de los grupos van alternase a partir de les siete de la tarde en dos escenarios independientes qu’evitarán los tiempos muertos ente grupu y grupu. Los dos escenarios, de gran superficie, van tar equipaos colos meyores equipos de lluz y soníu, garantizando con ello la calidá del espectáculu tamién na parte técnica.

Na parte musical, el vienres 25 van tar ellí: Nuberu, Llan de Cubel, Skanda, K-Nalón, Xera, Skama la Rede y Gomeru. El sábadu 26 será’l turnu pa: DRD, La Col.lá Propinde, Tejedor, Los Berrones, La Bandina, Dixebra y Chalaneru Sound.

La xente de la Xunta ta espardiendo los materiales de propaganda per toa Asturies. Tamién les entraes, que tarán a la venta en: Xixón: Café Trisquel, El Barucu, Llibrería Alborá ; Uviéu: La Casa Posafuelles, Isla de Cuba, La Deva; Avilés: El Cafetón ; Candás: La Gueta ; Gráu: L’Ablugu ; L.luarca: Panadería Aldín, Estancu La Cachona; Tinéu: Mesón Cervantes ; Salas: El Cobertizo; La Puela d’Ayande: Café Centro; Cangas del Narcea: Bar Azul; Mieres: La Buraka; La Pola Llena: La Xarrina; La Felguera: Llar de Keko; L’Entregu: Tom Mallory; La Pola Llaviana: El Riscar; La Pola Siero: El Diañu; Nava: La Posta;

El preciu de les entraes ye: Bonu de 2 díes anticipáu: 14€; Bonu 2 díes na puerta: 16€. Entrada 1 día anticipada: 8€; Entrada 1 día na puerta: 10€.

El Conciertu pola Oficialidá ñació va venti años como una iniciativa solidaria pa la financiación de les movilizaciones de la Xunta pola Defensa de la Llingua Asturiana. Aína, la participación de los meyores grupos asturianos y l’asistencia masiva de públicu añu tres añu, convirtiéronlu nun referente ineludible nel panorama musical asturianu.

Anguañu, pa la cellebración d’esti vixésimu aniversariu la Xunta entama una presentación más ambiciosa, tou un festival de dos díes que de xuru va valir p’arrancar con fuerza pal restu d’actividaes y movilizaciones que van llevase alantre nes siguientes selmanes.

La Xunta pola Defensa de la Llingua Asturiana quier animar a tola xente esmolecida pol futuru del nuesu idioma a asistir al conciertu y a tolos demás actos que de siguío va entamar la Xunta y tamién a aquellos qu’entame’l Conceyu Abiertu pola Oficialidá, que van cuntar como siempre cola participación y trabayu de la nuesa organización. Tamos a les puertes d’una reforma del Estatutu que va ser decisiva pal futuru de la llingua asturiana. Agora más que nunca ye’l momentu de trabayar pa qu’esti sea l’últimu Conciertu pola Oficialidá. Pa que por fin llogremos lo que tántos años llevamos persiguiendo.

¡Agora ye’l momentu! ¡L’Asturianu Llingua Oficial, Yá!



























(Espero sinceramente que esta tenga que ser de las pocas veces en las que me vea obligado a pedir perdón por la calidad de las imágenes, las condiciones ambientales y los medios técnicos no permitieron nada mejor, o como se diz equí: YE LO QUE HAY)